RC Chalamila asisitiza usimamizi wa Miradi ya Maendeleo

Posted on: June 2nd, 2023

Mkuu wa Mkoa wa Dar es salaam Mh. Albert Chalamila amewataka viongozi wa wilaya na Halmashauri kusimamia kwa weledi utekelezaji wa miradi ya  maendeleo huku wakifata sheria na taratibu  stahiki za manunuzi.

Rc Chalamila  ametoa wito huo leo Juni  1, 2023 wakati alipofanya ziara ya kikazi yenye lengo la kujitambulisha kwa viongozi na watumishi wa wilaya ya Kigamboni.

Aidha katika kikao hicho amewasisitiza Wah. Madiwani kuwa mstari wa mbele katika usimamizi wa miradi huku akiwata kuhamasisha wananchi kushiriki katika shughuli za Maendeleo.

Sambamba na hilo Mh. Chalamila alitoa rai kwa viongozi Idara ya Elimu kuja na mpango mkakati utakaosaidia kuinua elimu ndani ya wilaya huku ukilenga kuongeza mapato kwani uwezekano wa kufanya hivyo upo ikiwa tu wataamua kuwa wabunifu.

Akizungumzia swala la ukusanyaji wa mapato Mh. Chalamila alisema kumekua na ukusanyaji dhaifu hasa wa ushuru wa huduma hivyo ameelekeza watendaji kusaidia katika ukusanyaji wa kodi hiyo.

Akitoa neno la shukrani Mkuu wa Wilaya ya Kigamboni  Mh. Halima Bulembo alizitaja changamoto ikiwemo migogoro mikubwa ya ardhi na ubovu wa barabara.